Зошто е толку убаво во јануари?

Зошто е толку убаво во јануари?

Јануари е посебен месец, а зошто е тоа така прочитајте во редовите подолу.

Нова година е секогаш посебно убава во Крушево заради големиот број посетители, убавото време и снегот. Оваа година беше така, со исклучок на снегот.

Времето на 31-ви декември, на 1-ви и 2-ри јануари беше вистинска пролет. Можеби немавме снег, но имавме сончево време кое го искористивме за прошетка до Крушевско Езеро и забава со жива музика под отворено небо на Станич.

Потоа доаѓа празникот Дева кој е предвесник на Бадник и Божиќ. Уникатноста во Дева е што се работи за празник кој во христијански контекст го најавува Христовото раѓање. А, во Крушево најмладите со импровизирана ѕвезда во рацете ги посетуваат домовите и шират радосни песни. Овој празник привлекува се поголем интерес кај туристите. На овој начин 5-ти јануари се одбележува само во Витлеем, Израел.

На крајот на месецот се одбележува денот на раѓање на Тоше Проески. 25-ти јануари е денот кога луѓе од Македонија, Србија, Хрватска, Словенија, Бугарија… се собираат во Крушево за да покажат дека Тоше има само датум на раѓање.

Но, еве деновиве снегот повторно се врати кај нас. Имаме 30 центиметри снег и времето се отвора. Типичниот јануари е повторно во Крушево. Погледнете фото подолу.

Тоа е нашето Крушево. Нашиот град е поубав од викенд во викенд. Станува едно од најпопуларните места, а за тоа не е виновен само снегот, туку и сите гости од државата и надвор од неа. Крушево е наше и ваше. Крушево во јануари е дестинација само за вас.

Тоа е нашето Крушево. Крушево е најубаво во јануари. Крушево е секогаш најубаво.

Share on:

Ете го снегот ?

Ете го снегот ?

Размислував неколку дена да напишам текст со кој ќе го најавиме снегот во Крушево. Барем, нашата временска прогноза така кажуваше. Но, еве, текстот не се склопи ама снегот дојде ?

Крушево е обелено. Вчера имавме поројни врнежи од снег, кои беа продолжение на претходната ноќ. Денес имаме бели покриви на куќите, обелени дрвја и сонце. Глетката е прекрасна.

Овие фотографии се доволно за да ви го доловиме моменталното расположение во Крушево.

Температурите се се’ уште релативно ниски, но сонцето кое е силно од рано утрово и временската прогноза велат дека ќе имаме загревање наредните денови.

Преку овој пост сакаме да ги известиме нашите следбеници и посетители дека Крушево е речиси целосно исполнето со туристи за Нова година. Ве повикуваме сите Вас да го посетите следниот линк за да ја погледнете листата на сместувачки капацитети.

Ииии, се гледаме во Крушево ?

Пишува: Сотир Габелоски

Share on:

Сончево и убаво, сте поминале тука?

Сончево и убаво, сте поминале тука?

Се наоѓаме во еден период во кој се случуваат големи временски промени. Ако, минатиот викенд го искористивме за прошетка, наредни викенди веројатно е дека ќе имаме мали наноси од снег. Но, останува да видиме.

Пределот кој води до историската локација Слива, а потоа и до манастирот Св. Преображение беше едно од местата за прошетка овој викенд. Покрај популарното место како Крушевско Езеро, овој пат нуди одлични чувства кои се побудени од околината.

Кога поминувате покрај Гумење и се упатувате во нагорен правец кон детското одморалиште некогаш викано Шула Мина, а денес викано Бегова Корија доаѓате до еден предел кој е тунел од есеснки лисја.

Влегувате во тој дел од околу 500 метри и имате чувство дека сте заштитени од се што е надворешно благодарение на дрвјата и пожолтените и портокалови есенски лисја. Овој предел го одите со главата подигната нагоре, а обувките ви чекорат во море од натрупани слоеви од лисја.

Изминатиот викенд ни понуди убаво време кое гостите во Крушево го искористија за прошетка. Самите крушевчани ја одминаа кафе дружбата, која е традиција во викенд денови, и го искористија претпладнето и раното попладне за прошетка.

Викендот што ни претстои не ни ветува убаво време, се очекуваат дождови, а можеби и нови снегулки, но крушевската кујна е тука да ви понуди подеднакво убав престој во нашиот град. Затоа, Ве очекуваме!

Пишува: Сотир Габелоски
Фото: Викенд во Крушево®

Share on:

Високо на 1 400 метри

Високо на 1 400 метри

Веќе зборувавме и пишувавме за Мечкин камен. Боите кои се распостелуваат на ова историско место се најубави оваа есен. На пат кон ова истовремено излетничко место е и полетиштето за параглајдинг. Тоа е неизбежно. И погледот од таму е прекрасен, но особено одзема здив оваа есен и во овие сончеви денови.

Еве пак ќе се потсетиме на боите на есента кои се можеби највпечатливи на Мечкин камен, ама ќе ве потсетиме и на постот кој го посветивме на ова место.

Прочитај повеќе: Мечкин камен деновиве – неповторлива прилика

После овој пост (на линкот погоре) повторно се навраќаме на ова место. Деновиве и по објавување на овој блог пак ќе се вратиме оти е прекрасно. Свежо е, но боите и сонцето го привлекуваат нашиот тим одново да се враќа тука горе на 1 400 метри надморска висина.

Доволно е до овде да дојдете со автомобил и само да го истражите ова место. Ако сте за прошетка можете комотно да испешачите околу 3 до 4 километри до Мечкин камен и од 1 250 да се искачите на 1 400 м.н.в. Оставаме на вас. Ама, како и да е ова место топло го препорачуваме оваа есен.

Прогнозата за временските услови вели дека времето ќе остане претежно сончево и температурата од ден во ден ќе се подигнува. Затоа, ако доаѓате од друг град овој викенд дестинацијата која ќе ја изберете е токму Крушево, а дел од агендата мора да биде Мечкин камен.

Застанете на самото полетиште. Значи морате ! ! ! Оттука погледот е феноменален. Ја гледате Пелагонија. Гледате разнобојни дрвја. Гледате сино небо. Вдишувате, издишувате. Среќни сте. Мирот го вдишувате, стресот го издишувате.

Летото во Крушево е убаво. Тоа е посвежо и полесно за дишење. Зимата е убава заради снегот. Пролетта е добра како најава за летото. Но, овие фотографии покажуваат дека есента е подеднакво привлечна. Мислам дека ве уверивме со нашите фотографии и пренесени искуства.

Пишува: Сотир Габелоски

Share on:

Блог