Крушевско Езеро – мир, тишина, природна убавина

Крушевското езеро е едно од најпријатните места во Крушево. Опколено со зеленило, постелено со клупи, чист воздух и позитивни луѓе особено во летниот период.

Ова место е едно најраздвижените во пролетниот, летниот период и во текот на рана есен. Во близина се „Гумење“, повеќенаменското спортско игралиште, двојното тениско игралиште, фитнес зона и терените на ФК Питу Гули и овие содржини се фактор плус за популарноста на местото.

Езерото е опколено со патеки за пешачење и велосипедизам и тука ќе сретнете многу спортисти и рекреативци кои се одлучиле да го искористат убавото време. Можете да седнете на некој аод клупите и да ги почувствувате тишината и мирот што ова место ги носи.

Ви препорачуваме да „свртите еден круг“ околу Крушевско Езеро, да се восхитувате на пејзажите и ви ветуваме дека она што ќе го почувствувате тука ќе ве натера повторно да се вратите на ова место.

Пишува: Сотир Габелоски

Share on:

Како да направите поубави фотографии од Крушево?

Без разлика дали имате телефон или фотоапарат со себе. Без оглед дали сте аматер или професионален во фотографијата, или, пак, можеби никогаш не сте фотографирале. Без оглед дали Крушево го сакате повеќе во зима или лето… Еве ги нашите препораки како да направите најубавите фотографии од Крушево.

Поставеноста на куќите е навистина интересна. Тие се распоредени по падините на Бушева планина, а нивната висина варира. Варираат и стиловите на куќите, а најинтересно е скалестото подредување на живеалиштата на Крушевчани.

Што треба да направите?

За да ги направите најубавите фотографии од Крушево и со тоа да си создадете незаборавни спомени од нашиот град ќе треба да направите една мала обиколка на Крушево. Но, не се грижете, обиколката не е подолга од 2 километри и доволно е само да ја следите главната улица во градот.

Вашата прошетка со телефон/апарат и мало шише вода треба да започне од влезот на градот и да се движите во правец кон излезот кон Битола. Првата угорнина ќе ви понуди одлични пејзажи за да ја фотографирате гелеријата Никола Мартиноски, потоа жичарницата, скалесто подредените куќи и сите оние со уникатен традиционален изглед на фасадите. Фотографијата подолу е илустрација за првите фотографии кои можете да ги направите.

Потоа, како што наближувате кон излезот од градот и хотел Монтана Палас доаѓата до местото „Кај клупата“ кое на тацна ви ја дава Пелагонија. И ова е одлично место за да покажаете на вашите драги и пријатели дека Крушево е како во рајот – од горе се’ се гледа.

„Кај клупата“

Го одминувате хотел Монтана Палас кој е една импозантна градба и ликот хотелот го зачувал уште од времето на поранешна Југославија. Влезете и пробајте го крушевското традиционално јадење Чомлек и нема да зажалите. Излезете на тераса и направете уште неколку фотографии.

Од хотел Монтана Палас Крушево

По неколку стотини метри пристигнувате пред споменикот на Питу Гули (од лева страна). Ги искачувате скалите и од тука имате неколку одлични можности за зграпчување пејзажи. Погледнете подолу.

Фото: од локација на споменикот на Питу Гули, близу хотел Монтана Палас

Продолжувате по истиот пат и патоказите ќе ве одведат до жичарницата. Ја одминувате и стигнувате до наредната кривина. На тоа место ќе забележите огледало за побезбендо разминување на автомобилите, а веднаш пзоади него го имате делот од Крушево по кој чекоревте до тој момент. Тука можете да ја фотографирате црквата Св. Никола, која се наоѓа во центарот на градот, гордо развиореното македонско знаме, а јасно ќе се гледаат многу ридови и планини во далечината.

Ова се нашите предлози како да направите поубави фотографии од Крушево. Кога сте во Крушево меѓу другите уникатни работи кои што може да ги пробате фотографирајте, правете „селфиња“ и воодушевувајте се на пејзажите кои одземаат воздух.

Ова се нашите предлози, но кои се вашите? Испратете ваш текст на vikendvokrusevo@yahoo.com или на нашите профили на ФБ и Инста.

Share on:

Што најпрво ќе направам кога ќе помине корона вирусот? (ДЕЛ 2)

Продолжува од: Што најпрво ќе направам кога ќе помине корона вирусот? (ДЕЛ 1)

Пристигнувам пред жичарницата и маркетот Џокере. Очигледно е дека имало движење и жичарницата се подготвува за работа. Тоа ќе биде вистинска атракција за туристите кои ќе ја користат жичарницата и во лето.

Продолжувам нагоре. Продолжувам да го „газам“ крушевското џаде, односно главната улица.

Се поздравувам со пријатели, се сретнуваме со гости од други градови, ги минувам продавниците и се довикуваме со луѓето од истите.

Доаѓам пред местото „Гумење“, уште едно историско место во Крушево. Чувствувам мирис на вкусни традиционални јадења од Крушевска Одаја.

Пред мене осветлена е спомен куќата „Тодор Проески“ и чекорм кон Крушевско Езеро пред да тргнам за назад, кон центарот на Крушево.

Веќе сум во центарот. Се слушаме со другарот на телефон и ми кажува дека е веќе во пицерија Скар.

Седнуваме таму и го правиме првото „селфи“. Го објавуваме со опис: „Повторно сме назад. На старото место. #Рестарт“. И, навистина! Се’ се враќа на старото вистинско место. Повторно сме во Скар. Се смееме, пиеме чај и потоа нарачуваме топено сирење, пица или пита „Скар“.

Околу 23 часот веќе сме дома. Го отворам лап топот и продолжувам со читање на материјалите од мастер студиите. Во 1 часот „се одјавувам“ и повторно можам јас, а и сите ние, да се псоветиме на нашето стандардно секојдневие, на нашите амбиции, нашата работа, нашиот убав живот.

Вака ќе изгледа првиот ден по завршување на оваа криза, а вашиот?

#ЗаштитиСе #ОдНасЗависи

Сотир Габелоски

Share on:

Што најпрво ќе направам кога ќе помине корона вирусот? (ДЕЛ 1)

Не размислував многу на оваа тема, но почувствував колку ми фалат некои работи откако се затворија кафулиња, теретани, хотели, па почнаа полициски часови, па „бомбардирање“, цело време, со вести за вирусот и многу други работи.

Покрај тоа, како и сите вие, што сакаме ова час поскоро да помине, имам и други желби со кои си ја лечам сегашната носталгија за тоа што ни’ се промени секојдневието. И, таа моја желба, или желби, не е нешто особено или нешто големо. Тоа е повторно дел од обичниот мој живот. Нешто што е толку обично, но дури сега разбирам колку ми фали и колку на сите нас ни значи.

Ајде, на кратко да ви кажам како го замислувам првиот ден по корона вирусот…

Замислувам….

Замислувам дека е работен ден. Тој прв ден откако секоја опасност е далечна (тоа можеби и никогаш нема да се случи, да не постои апсолутно никаква опасност).

Посакувам тој ден да е стандарден, типичен за моето секојдневие. Кога станувам околу 6 и 50 часот, ја земам стандардната доза на овошје и во 7 и 50 тргнувам кон општина Крушево. На работното место.

Замислувам тој ден, околу 9 и 30 часот да испијам Еспресо во голема шолја во пицерија Скар. Едно од стандардните места за најубаво кафе. Тие 10 минути често пати се најдобриот дел од денот, кога имам прилика да поразговарам со пријателот и да начнеме теми кои треба да ги завршиме по 16 часот.

Потоа, денот тече тековно до 16 часот.

Завршувам околу 16 часот и замислувам ручек со домашните. Од 17 до 19 работам на обврските поврзани со мастер студиите.

Потоа го шетам крушевското џаде. Односно тоа е еден „потег“ од влезот на град Крушево, покрај местото кое ние крушевчани го викаме „Кај клупата“ од каде што дење кристално се гледа Пелагонија, а ноќе се истакнува Кривогаштани кое според светлата изгледа на крст. Застанувам на 5 минути тука и правам едно „Инста стори“. Продолжувам до хотел Монтана Палас и го гледам целиот осветлен, со автомобили паркирани пред објектот, што значи дека хотелот се подготвува за гости, додека тивко ветре ме милува на лицето.

Продолжувам понатаму. Го одминувам хотел Илинден, споменикот Питу Гули и се упатувам кон жичарницата и „Гумење“… Продолжува

Пишува: Сотир Габелоски

*Текстот е пишуван на почетокот на април, 2020

Share on:
Викенд во Крушево

Викенд во Крушево

error

Уживате во нашиот сајт? Споделете да дознаат и другите. :)